راولپنڈی(نیوز رپورٹر)

گورنمنٹ ایسوسی ایٹ کالج برائے خواتین سیہال، راولپنڈی نے ایسوسی ایٹ ڈگری پروگرام (اے ڈی پی) سوشیالوجی کے سیشن 2024–2026 کے نتائج میں 100 فیصد کامیابی حاصل کرلی۔ 27 اکتوبر کو اعلان ہونے والے نتائج کو کالج کی معیاری تدریس، اساتذہ کی محنت اور طالبات کی لگن کا ثبوت قرار دیا گیا ہے۔

نتائج کے مطابق اریبہ نور نے 4.00 میں سے 3.82 سی جی پی اے کے ساتھ پہلی، سمیعہ کنول نے 3.79 کے ساتھ دوسری، اقصہ اظہر نے 3.78 کے ساتھ تیسری اور مصباح نجف نے 3.76 سی جی پی اے کے ساتھ چوتھی پوزیشن حاصل کی۔ پرنسپل سمیرا حمید، کالج انتظامیہ اور تدریسی عملے نے کامیاب طالبات کو مبارک باد پیش کی۔پرنسپل سمیرا حمید کی قیادت میں اس کامیابی کو مؤثر منصوبہ بندی، مسلسل رہنمائی، تعلیمی نظم و ضبط اور ٹیم ورک کا نتیجہ قرار دیا گیا۔ شعبۂ سوشیالوجی کی سربراہ پروفیسر حفصہ نذیر سمیت اساتذہ کی محنت اور طالبات کی حوصلہ افزائی نے بھی اہم کردار ادا کیا۔کالج انتظامیہ کے مطابق رواں تعلیمی سال میں اے ڈی پی کمپیوٹر سائنس اور اے ڈی پی ایجوکیشن کے پروگرام شروع کرنے کی منصوبہ بندی کی جا رہی ہے، جس کا مقصد طالبات کو جدید ٹیکنالوجی اور شعبۂ تعلیم میں مزید مواقع فراہم کرنا ہے۔کالج میں نصابی سرگرمیوں کے ساتھ ہم نصابی اور غیر نصابی سرگرمیوں پر بھی توجہ دی جاتی ہے، تاکہ طالبات میں خود اعتمادی، قائدانہ صلاحیتوں اور ابلاغی مہارتوں کو فروغ دیا جا سکے۔ ادارے کی یہ کامیابی سیہال اور گردونواح میں خواتین کی اعلیٰ تعلیم کے فروغ کی جانب اہم پیش رفت ہے۔پرنسپل سمیرا حمید نے کہا کہ یہ کامیابی مخلص قیادت، محنتی اساتذہ اور پُرعزم طالبات کی مشترکہ کاوشوں کا نتیجہ ہے۔ کالج مستقبل میں بھی تعلیمی معیار بہتر بنانے اور طالبات کے لیے اعلیٰ تعلیم کے مزید مواقع پیدا کرنے کے لیے کوشاں رہے گا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔