یونائٹڈ چرچز آف کونسل کے ایگزیکٹو ڈائریکٹر پاسٹر سیمسن سہیل کو شیلڈ پیش کی

اسلام آباد (نیوز رپورٹر) اسلام آباد چیمبر آف کامرس اینڈ انڈسٹری کے سابق صدر اور معروف کاروباری رہنما ظفر بختاوری نے ملک کی تعمیر و ترقی، بین المذاہب ہم آہنگی، سماجی خدمت اور قومی یکجہتی کے فروغ میں مسیحی برادری کی گرانقدر خدمات کو خراجِ تحسین پیش کرتے ہوئے یونائٹڈ چرچزآف کونسل کے ایگزیکٹو ڈائریکٹر پاسٹر سیمسن سہیل کو خصوصی شیلڈ پیش کی اور ان کی خدمات کو سراہا۔اس موقع پر ظفر بختاوری نے کہا کہ پاکستان کی تعمیر و ترقی میں مسیحی برادری نے ہمیشہ نمایاں اور مثبت کردار ادا کیا ہے۔ تعلیم، صحت، سماجی بہبود، انسانی خدمت اور دیگر شعبوں میں مسیحی برادری کی خدمات ملک کے لیے قابلِ قدر سرمایہ ہیں۔ انہوں نے کہا کہ پاکستان کی ترقی اور خوشحالی میں تمام مذہبی برادریوں کا کردار اہم ہے اور ایک مضبوط، پرامن اور خوشحال پاکستان کے لیے باہمی احترام، برداشت اور اتحاد کو فروغ دینا وقت کی اہم ضرورت ہے۔انہوں نے کہا کہ مسیحی برادری نے قیامِ پاکستان سے لے کر آج تک قومی زندگی کے مختلف شعبوں میں اپنی صلاحیتوں کا بھرپور مظاہرہ کیا ہے۔ مسیحی برادری سے تعلق رکھنے والے اساتذہ، ڈاکٹرز، نرسز، سماجی کارکنوں، کاروباری افراد اور دیگر شعبوں سے وابستہ افراد ملک و قوم کی خدمت میں اہم کردار ادا کر رہے ہیں۔ ان خدمات کا اعتراف نہ صرف ان کی حوصلہ افزائی کا باعث بنتا ہے بلکہ معاشرے میں بین المذاہب ہم آہنگی اور قومی یکجہتی کو بھی فروغ دیتا ہے۔ظفر بختاوری نے پاسٹر سیمسن سہیل کی سماجی، مذہبی اور بین المذاہب ہم آہنگی کے لیے خدمات کو بھی سراہتے ہوئے کہا کہ مختلف مذاہب اور طبقات کے درمیان مثبت روابط کو مضبوط بنانے کے لیے ایسے افراد کا کردار انتہائی اہم ہے۔ انہوں نے کہا کہ معاشرے میں امن، محبت، برداشت اور بھائی چارے کے فروغ کے لیے مذہبی رہنماؤں اور سماجی شخصیات کو اپنا کردار مزید مؤثر انداز میں ادا کرنا چاہیے۔انہوں نے مزید کہا کہ پاکستان میں بسنے والی تمام مذہبی برادریاں ملک کا اہم حصہ ہیں اور ان کے حقوق، عزت اور وقار کا تحفظ ہم سب کی مشترکہ ذمہ داری ہے۔ قومی ترقی کے عمل کو آگے بڑھانے کے لیے ضروری ہے کہ تمام طبقات کو ساتھ لے کر چلتے ہوئے ایک ایسا معاشرہ تشکیل دیا جائے جہاں ہر شہری کو مساوی مواقع حاصل ہوں۔اس موقع پر پاسٹر سیمسن سہیل نے ظفر بختاوری کی جانب سے مسیحی برادری کی خدمات کے اعتراف اور شیلڈ پیش کرنے پر اظہارِ تشکر کرتے ہوئے کہا کہ ایسی حوصلہ افزائی سے خدمتِ خلق اور بین المذاہب ہم آہنگی کے جذبے کو مزید تقویت ملتی ہے۔ انہوں نے کہا کہ مسیحی برادری پاکستان کی ترقی، خوشحالی اور امن کے لیے اپنا کردار جاری رکھے گی۔تقریب کے دوران پاکستان میں بین المذاہب ہم آہنگی، قومی یکجہتی، سماجی خدمت اور مختلف مذہبی برادریوں کے درمیان روابط کو مزید مضبوط بنانے کے عزم کا اظہار بھی کیا گیا۔ شرکاء نے اس امر پر زور دیا کہ ملک کی ترقی کے لیے باہمی احترام، برداشت، رواداری اور اتحاد کو فروغ دینا ناگزیر ہے۔