راولپنڈی (سٹاف رپورٹر): راولپنڈی میونسپل کارپوریشن کے نئے چیف آفیسر فیصل شہزاد نے چارج سنبھالنے کے بعد اپنی ٹیم کے ہمراہ راجہ بازار ماڈل بازار کا دورہ کیا۔ چیف آفیسر نے ماڈل بازار کے مختلف حصوں کا معائنہ کیا اور وہاں صفائی ستھرائی، انتظامی امور سمیت دیگر سہولیات کا جائزہ لیا۔
اس موقع پر چیف آفیسر فیصل شہزاد نے ماڈل بازار میں موجود تاجروں سے ملاقات بھی کی اور ان کے مسائل سنے۔ تاجروں نے انہیں مختلف مسائل اور مشکلات سے آگاہ کیا، جن کے حل کے لیے چیف آفیسر نے متعلقہ افسران کو ضروری ہدایات دیں۔
نئے چیف آفیسر کی تعیناتی کے بعد راجہ بازار ماڈل بازار کا یہ پہلا دورہ تھا۔ واضح رہے کہ وزیراعلیٰ پنجاب کی ہدایت پر صوبے کے مختلف شہروں میں ماڈل بازار قائم کیے گئے ہیں، جہاں شہریوں کو روزمرہ استعمال کی اشیائے ضروریہ مناسب نرخوں پر فراہم کرنے کے لیے سہولیات دی جا رہی ہیں۔